Við fengum Ágúst til liðs við okkur á tímabili þar sem hugbúnaðarteymi sem ég stýri var að ganga í gegnum verulegar breytingar. Hlutverk teymisins og samsetning þess var að breytast, samhliða því sem samstarf við verkkaupa var í mikilli endurmótun. Umhverfið var flókið þar sem starfsfólk starfaði í tveimur löndum, bæði á skrifstofu og í fjarvinnu, og samvinna við verkkaupa var þétt og krefjandi.

Ágúst kom inn með skýra og nýja sýn á hvernig teymi virka og hvaða þætti okkur vantaði í stjórnun og teymisvinnu. Hann leiddi markvissar vinnustofur með teyminu og stjórnendahópnum þar sem áhersla var lögð á sálrænt öryggi, samskipti og viljandi menningu. Sú nálgun hjálpaði okkur að setja skýrari ramma utan um samtal, ábyrgð og sameiginlega sýn.

Árangurinn var áþreifanlegur á þann hátt að samskipti innan teymisins bötnuðu, stjórnunartaktur varð skýrari og stjórnendahópurinn sterkari og samstilltari. Fyrir mig persónulega var samstarfið lærdómsríkt og krefjandi á uppbyggilegan hátt. Ágúst hvatti mig til að horfa markvissar á dýnamík innan teymisins og leggja meiri áherslu á samskipti og að efla fólk í kringum mig. Mín nálgun til stjórnunar hefur breyst í kjölfarið, að mínu mati mjög til batnaðar.

Ég hef mjög góða reynslu af samstarfi við Ágúst og mæli hiklaust með honum í verkefni sem snúa að teymisuppbyggingu, breytingum og styrkingu stjórnendahópa í flóknu og kröfuhörðu rekstrarumhverfi.

Ægir Örn Leifsson, Development Manager, Thula - Nordic Source Solutions

Ég hef mjög góða reynslu af því að vinna með Ágústi. Hann kom inn í umfangsmikið breytingarferli í talsvert flóknum rekstri og gaf okkur mikilvæg verkfæri til að stýra því öllu í rétta átt.

Hann aðstoðaði okkur við að kortleggja úrbótatækifæri í starfseminni, sem og efla innra skipulag og gæði í stjórnun. Hann aðstoðaði við uppbyggingu teyma og veitti handleiðslu til einstakra stjórnenda, sá um framkvæmd stjórnendamats, hélt utan um gerð samskiptasáttmála og framkvæmdi vinnustofur með starfsfólki.

Hann nálgaðist öll sín verkefni af mikilli fagmennsku og heilindum. Hann er lausnamiðaður, skipulagður og brennur fyrir því að ná fram raunverulegum árangri í sínu starfi. Það var virkilegt gæfuspor fyrir okkur að fá hann Ágúst til liðs við okkur á þessum tímapunkti og ég get hiklaust gefið honum mín bestu meðmæli.

Ég er virkilega þakklát fyrir okkar samstarf. Það var ótrúlega verðmætt að fá Ágúst inn á þessum tímapunkti, það hjálpaði mér mikið við að ná fókus í nýju starfi og flóknum aðstæðum.

Og svo er Ágúst bara ótrúlega þægilegur, áhugaverður og góður einstaklingur. Og það er magnað hvað maður vex sjálfur mikið af því að hitta og vinna með svoleiðis manneskjum

Eybjörg Helga Hauksdóttir, Forstjóri Eir, Skjóls og Hamra.

„Ágúst veitti mér ómetanlegan stuðning þegar ég steig mín fyrstu skref sem deildarstjóri í krefjandi og flóknu starfsumhverfi á Landspítalanum. Hann hjálpaði mér að fóta mig í nýju hlutverki, takast á við stjórnunarlegar áskoranir og bæta samskipti innan stjórnendateymis. Jafnframt studdi hann við stefnumótun deildarinnar, sem gerði mér kleift að móta skýra framtíðarsýn og ná árangri í starfi. Ásamt þessu aðstoðaði Ágúst jafnframt við hönnun og innleiðingu nýs skipurits fyrir deildina, sem var lykilþáttur í að tryggja árangur á umbrotatímum.

Ágúst er framúrskarandi stjórnunarráðgjafi sem beitir óhefðbundnum og heildstæðum aðferðum til að leysa flókin viðfangsefni. Hann leggur áherslu á að finna rót vandamála og þróa lausnir sem skila varanlegum árangri. Með skapandi hugsun, yfirvegaðri nálgun og djúpri þekkingu veitti Ágúst mèr faglega ráðgjöf sem stuðlaði að raunverulegum og varanlegum umbótum, sem standast kröfur flókins rekstrarumhverfis spítalans.“

Viktor Ellertsson, deildarstjóri veitingaþjónustu Landspítala

„Það var mikið gæfuspor fyrir Stjórnvísi þegar Ágúst Kristján bauð fram krafta sína til að endurvekja og skipa nýja stjórn í faghóp um breytingastjórnun.

Strax kom í ljós sú mikla leiðtogahæfni og sterki bakgrunnur sem Ágúst býr yfir. Hann leiddi árangursríka stjórn af brennandi áhuga sem hélt fjölmenna áhugaverða fundi með innlendum sem erlendum fyrirlesurum og mikil fjölgun varð á félögum í faghópnum. Þá hafði Ágúst frumkvæði að því að búa til verklagsreglur fyrir faghópinn sem voru í framhaldi innleiddar til allra 25 faghópa Stjórnvísi. Loks var hann óspar á góð ráð er varðar stjórnun félagsins sjálfs.

Ágúst fær frábærar hugmyndir, er ósérhlífinn, fljótur að lesa í aðstæður og taka ákvarðanir, metnaðarfullur, hreinskilinn, vandvirkur, nákvæmur, lætur verkin tala og er einstaklega skemmtilegur og þægilegur í samskiptum.“

Gunnhildur Arnardóttir, framkvæmdastjóri Stjórnvísi

„Ég hef verið þeirrar gæfu aðnjótandi að kynnast Ágústi og sjá hann að störfum í fjölbreyttum verkefnum bæði sem ráðgjafa og sem kennara í Opna háskólanum.

Í ráðgefandi hlutverki hef ég séð Ágúst leysa flókin og viðkvæm umbótaverkefni sem kröfðust mikillar stjórnunarþekkingar ásamt færni og næmni í persónulegum samskiptum. Hann er yfirvegaður og lausnamiðaður í krefjandi aðstæðum og á auðvelt með að fá fólk með sér í að skapa lausnir sem virka.

Ég sótti símenntun á tveimur námskeiðum hjá Ágústi í Opna háskólanum, en sjálf er ég með stjórnunarmenntun ofan á doktorspróf í klínískri sálfræði. Námskeiðin hjálpuðu mér að skerpa færni mína og fókus. Nálgun hans hefur nýst mér sérlega vel í starfi mínu sem ráðgjafi við Alþjóðaheilbrigðismálastofnunina þar sem reynir mjög á menningarnæmi, greiningarfærni og innleiðingu áhrifaríkra lausna í umbótum í geðheilbrigðismálum.

Ágúst nálgast verkefni sín af metnaði, einlægum áhuga og grósku hugarfari. Hann býr yfir mikilli þekkingu, reynslu og færni og það er sönn ánægja að vinna með honum.“

Ingibjörg Sveinsdóttir, eigandi Hvata – Catalyst Consulting, slf. og ráðgjafi við Alþjóðaheilbrigðismálastofnunina.